أبن بار
زميل وشخص عزيز طلب مني نطلع مكة ... واخبرني انه ناوي يسوي عمره عن أبوه الله يرحمه .. قلت خير .. حتى أنا كمان سأعتمر عن أبي .. نخليها يوم الجمعة ونصلي الجمعة هناك إن شاء الله.
رحنا .. سوينا عمرتنا وإلي علينا بالخير .. وحنا راجعين إلا وصاحبي يهدي السرعة ... سألته: خير
قال بدخل رابغ ( وهي قرية على الطريق)
سألته لبش... ويش نروح رابغ
قال: بتشوف بعينك
دخلنا البلد وأنا مستعجب .. إلا وصاحبنا وقف جنب سوبر ماركت وقال... انزل شيل معي لو تبغى الأجر.
قلت أشيل ولا يهمك .. بس لمين.
قال أسرة هنا .. أبي الله يرحمه كان يتولاها دائما.. وما حبيت إن الخير ينقطع بوفاة الوالد .. وماني رايح اقطع صدقات أبي ولو انه مات .. فأنا ومالي ملك أبي.
قلت: الله يجزاك كل خير.. وين الناس التي تبر أبوها كذا بعد الممات.. البعض الله يهديه يقاطع حتى أعمامه بعد وفاة أبوه... وأنت ما شاء الله عليك ... حتى سعي أبوك على هذه الأرملة ما وقفته.
رحنا ودقينا على البيت ... خرجت امرأة عجوز.. سلم عليها صاحبنا وسلم عليه الأطفال.. (واضح انهم يعرفوه زين وإنهم متعودين على جيته دايما ) .. وبعدين نزلنا الأغراض في الحوش ... واعطاها مبلغ من المال .. وجلست تدعي له ولأبوه بالرحمة ...موقف جدا رائع .. يهز القلب بحق.
مشينا .. كملنا الطريق ... إلا وقبل مستورة ( وهي قرية أخرى تقع على الطريق ) بحوالي عشرة كيلو .. إلا وفيه سيارة متوقف على جنب.. وفيه رجال شايب كبير في السن بيشاور .. وأهله داخل السيارة هدينا السرعة ووقفنا... خير يا عم.
قال: ابداً .. الكويتش مخروم.
ظنينا انه طالما كبير في السن ما يقدر يغير الكويتش الاحتياطي .. خاصة أن اكبر عياله عمره حوالي 11 سنه... قلنا طيب ... هات الكويتش الاحتياطي نغيره لك.
قال: حتى الاحتياطي مخروم .. والعدة إلي ترفع السيارة كمان خربانه.
مدري ويش فيها مشكلة بمعنى الكلمة .. خاصة إنهم منقطعين في الطريق.. وأسرة فيها نساء وأطفال... ويمكن حتى ما معهم ماء.
هذا الموقف لأي مسلم ... هو كنز من الحسنات .. لأنه من فرج عن مسلم كربة من كرب الدنيا فرج الله عنه كربة من كربات يوم القيامة... كيف عاد أسرة كاملة في كربة !!!
اخذنا الكويتش ... وقلنا له بنروح نصلحه في قرية مستورة .. وخاصة ان بيننا حوالي عشرة كيلوا فقط تقريبا ....
إلا والرجال قال: طيب خذوا الولد معكم.
قلنا له:يا رجال ما يحتاج... بعدين نتأخر... ولا يصير ظرف تقلقوا عليه .. خلوه معاكم.
قال: ابدا .. خذوه معاكم
قلنا: خير
إلا والولد يسأل ابوه: يابه .. ما عطيتني فلوس للكويتش.
رد عليه وكأنه أحرجه: قال هه ... نسيت الفلوس ... ما جبت معي فلوس:
رد صديقي بسرعه:اركب اركب .. بعدين وخير.
وبعد ما مشينا .. إلا وصديقي يسأل الولد: ما شاء الله عليك .. انت في سنه كم ؟
قال: أولى متوسط.
قال خير .. طيب أبوك وين شغال... (عرفت انه يبغى يتحرى عنهم .. هل هم من مستحقي الصدقات ... أم فعلا الأب نسي الفلوس)
قال: ما يشتغل .. مريض.
قال: خير إن شاء الله
وجلس يتحدث معه أحاديث جانبية ... حتي يتحرى عنهم أكثر.
وبعدين قال: الله يعينكم .. طيب .. ليه ما تغيروا ها الكويتش وترتاحوا .. ولا كل كويتشات السيارة كده.
رد عليه الطفل بضحكه بريئة: كل الكويتشات كده .. هذا أحسنهم .. وكل يوم ندور خمسة ريال لجل نصلحهم.
ضحك صاحبنا بسرعة وقال: خير إن شاء الله.
وصلنا لمستورة .. ووقفنا عند اول محل كويتش .. ونزلت انا الكويتش من السيارة .. إلا وصاحبنا يقول للعامل: حط كويتش جديد نفس المقاس
إلا والولد يصرخ:ليه جديد .. ما عندنا .. ابوي رايح يذبحني.
رد عليه صديقي: اقول اسكت ولا كلمة .. انت معانا مجرد امانه لحين نرجعك لأبوك .. والأمانة ما تتكلم ولا تهرج .. تراني عصبي .. فاهم.
قال الولد: طيب.
وسأل العامل عن شئ ... وقال له العامل ما عندي .. ادخل البلد أكيد بتلقى.
ركبنا السيارة وانا ما ادري وين رايحين .. بس متأكد انه خير... وقفنا عند محل زينة سيارات وقال لنا اصبروا في السيارة... دخل المحل وخرج ومعاه عده لرفع السيارات ... وأول ما ركب السيارة ... إلا والولد يسأل: حتى انتم عدتكم خربانا ؟
إلا وصاحبي يرد: اقول اسكت ولا كلمة .. انت معانا امانه .. والأمانه ما تهرج .. تراني عصبي.
رجعنا للمحل .. كان العامل ركب جاب الكويتش الجديد .. إلا وصاحبي يقول للعامل
أعطيني كمان ثلاثة جديدة .. نخليها أربعة مرة وحده.
إلا والولد قام يصارخ: اربعة .. ياويلي من ابوي .. رايح يقول انا إلي قلت لك اشتريهم وبعدين نحاسبك.
طالع فيه صديقي: هالمرة بنظرة صارمة وقال ... انا كم مرة اقول لك اسكت ... انت امانه ... والأمانة ما تهرج ... ولا تقول كلمة .. فاهم .. تراني عصبي ... لا يغرك سكوتي
سكت الولد وهو يطالع يمين و يسار .. ويناظر فيني يبغاني اتكلم .. بس سويت نفسي ماني شايفه وسكت.
جاني صديقي وسألني .. معاك مية ريال سلفة أكمل حق الكويتش ... لحين نوصل ينبع واعطيك أياهم.
قلت: آسف .. سلفه ما في .. تبغي مشاركة في الأجر ... على عيني وعلى راسي
قال: يا ابن الحلال عيب عليك سلفني مية ريال.
قلت: آسف اسلفك لو وصلنا .. لكن هنا ما في غير المشاركه.
ناظر لي وقال: يا ابراهيم .. هالمشوار من يوم لبسنا الإحرام وأنا اسأل الله أن يكتب أجره لأبوي الله يرحمه ... يا ابراهيم .. ليه تستكثر علي إني ابر ابوي .. ولو بكويتش .. ويش هالقسوة إلي فيك يا خوي.
سكت ... ولا قدرت انطق بكلمة وقلت: ابشر ... أتفضل .. ويكفي اني مشيت معاك وشلت بيدي .. الله يجزاك كل خير.
ركبنا السيارة ورجعنا .. والولد ساكت ولا فتح فمه بكلمة ... إلا وبعدين قال: بصوت واطي (خايف من صديقي): ترى ما عندنا نعطيك حق الكويتش.
رد عليه صديقي: ولا يهمك .. أول ما تخلص مدرسة وتتخرج من الجامعة .. وتتوظف .. أول ما تأخذ أول راتب أعطيني فلوسي .... . ولو ما لقبتني أعطيها لأمك زين .. بس هاه أخبرني.. انت تصلي ولا ما تصلي .. ترى لو ما تصلي ما راح اخذ منك ريال.
قال: والله أنا أصلي ... واسأل ابوي.
رد عليه .. خلاص اتفقنا .. وسكتنا ... لحين وصلنا سيارة أبوه.
أول ما شافنا أبوه من بعيد ... ابتسم وجلس يدعي لنا.. لكن يوم شافنا ننزل في الكويتش ... قام يصارخ في ولده: انت مجنون ... انا قلت لك اشتري كويتش؟ .. من وين لنا الحين.
إلا والولد يقول: يابه .. والله قلت له .. بس كلما اكلمه يقول لي .. اسكت .. أنت أمانه ... والأمانة ما تهرج .. تراني عصبي.
إلا وصديقي يقول: يا رجال .. كلنا تصير علينا ظروف .. بالذات في الطريق تصدق ... من يومين بس .. كنت أنا وصديقي هذا رايحين المدينة .. إلا وخلص البنزين لاهو كان معاه فلوس ولا انا ... كلنا نسينا نشيل فلوس ... كل واحد معتمد على الثاني ... ولولا رجال الله يستر عليه وقف وعبى لنا بنزين ... وأعطانا خمسين ريال احتياط كنا ورطنا .. مثلك بالضبط .. ثم نظر لي وسألني : مو صح يا ابو عبد المجيد ؟
طالعت فيه وانا مستغرب: قلت ايه.
وبعدين قال: ولو جيتك في البيت ابيك تذبح لي اكبر طلي عندكم.
قال: ابشر وتعال الحين عشاكم عندنا.
قلنا: الأيام جايه إن شاء الله ... وركبنا السياره على طول ... بدون حتى ما نرد عليه
سألته: متى رحنا المدينة وخلص علينا البنزين وما كان معانا فلوس؟؟؟
قال: الله يغفر لي .. ويش تبيني اقول .. هذه صدقة عن ابوي الله يرحمه! ما حبيت احرجه قدام الأطفال.
قلت: طيب ... كنت خليتنا نرفع له السيارة ونركب الكويتش!
قال: هذا مشكلة اكبر.. ساعتها بيجلس يدعي لنا ... وكل الحريم في السيارة رايحين يسمعوا .. طيب ليه نحرجه والا نجرحه؟ .. نمشي احسن ... ونسأل الله ان يتقبلها وان يرحم ابوي .. مشينا شويه ... وكان باقي على صلاة العشاء دقائق ... لقينا سيارة تبيع ماء وبسكويت وشاي وقهوة ... وعندها شاحنات واقفة ... وكل واحد وضع له سجاده لجل يصلي عليها .. والبعض ما معاه أي سجاد ويصلي على التراب.
قلت لصديقي: خلينا نوقف ونصلي جماعه
وقفنا ... وحطينا السجادتين إلي معانا بالعرض ... لجل يصلي عليها إلي ما معاهم سجاد
بعد الصلاة ... إلا وصديقي يسال البائع .. ما عندك سجاد للبيع ؟
قال ... لا
قال ... ولا بساط عادي ؟
قال ما عندي
قال خير إن شاء الله
ركبنا السيارة ومشينا .. ويوم قربنا على كوبري الرايس .. (وهي قرية صغيرة على الطريق).. إلا وصاحبنا يهدي السرعه ويطلع الكوبري
سألته: خير ؟
قال: خير
قلت ادري .. بس ليش هديت ؟
قال: عمل خير
قلت: وين عمل الخير ... حنا في صحراء ما عندنا احد .. لاتكون تبي تدخل الرايس
قال: لا
قلت ... اجل وين عمل الخير ثم قال قوله تعالى ( وهدوا إلى الطيب من القول وهدوا إلى صراط الحميد ) اسأل الله أن نكون منهم .. بنرجع مستورة
سألته ... ليش غلطانين في حساب الكويتش ؟
قال: أي كويتش الله يهديك هذا الموضوع نسيناه
سألته: اجل ليش نرجع ؟
قال: تسلفني وانا اقول
قلت: اما هذه كثر منها .. سلف ما راح تشوف لو تطلع عيونك .. انا شريك رسمي ... وانت لك أجر الشيل.
سألني: شيل .. ايش ؟
قلت: ما ادري .. بس احس ان السالفه فيها شيل .. من الصبح وحنا نشيل ولله الحمد...
رغم اني ما ادري ويش السالفه .. بس إلي شفته اليوم ... يخليني متأكد إن شاء الله إنه خير
قال: يا إبراهيم .. انت مستكثر إني اسوي لأبوي خير.
قلت: أنت مستكثر أني احط لأبوي نصيب مع ابوك !!!
من طيب اخلاقي ... ومن كرمي باخلي السالفه بالنصف بين أبوي وابوك ... عاجبك .. ولا روح دور لك على مكينة تصرف منها فلوس .. ويمكن تلاقي ... ويمكن ما تلاقي ... بس علمني .. ويش السالفه ؟
قال: بنرجع مستورة .. ونشتري سجاد كبير .. وبنحطهم وحده عند السيارة الي شفناها .. والثانية .. عند السيارة إلي مثلها بس وانت رايح على جده .. والثالثة بنحطها في الأرض ... ونحط حولها حجار كبيرة لجل يبان ان هذا مكان مخصص للصلاة .. وبنشوف مكان يكون مرتفع وقريب من الخط .. قال رسول الله صلى الله عليه وسلم (من بنى لله بيتا ولو قدر مفحص قطاة بنى الله له بيتا في الجنة).
رجعنا مستورة .. واشترينا ثلاث سجادات كبار .. وجمعنا حجار كبيرة ... لجل نحدد المسجد إلي نبي نسويه ...رحنا للسيارات الي تبيع على الخط .. واعطيناهم السجاد .. ومبلغ من المال ... لجل يفرشوا السجاد وقت الصلاة ويهتموا بيه ... وأشهدنا الله عليهم ... وكفى بالله شهيدا... بعد كدا بدينا ننزل الحجار من السيارة ... واسمع صاحبي يقول آية وحده يكررها طول الوقت:
(ربنا اغفر لي ولوالدي وللمؤمنين يوم يقوم الحساب)
(ربنا اغفر لي ولوالدي وللمؤمنين يوم يقوم الحساب)
(ربنا اغفر لي ولوالدي وللمؤمنين يوم يقوم الحساب)
وما ان ركبنا السيارة إلا واسمعه يقول: اللهم إن كنت تعلم ان هذا العرق نزل على وجهي لوجهك الكريم ... فحرم وجه أبي على النار.
الله أكبر على مثل هذا الدعاء ... كم باقي بيننا من الناس مثل هذا الشاب !!!
قلت وانا احاول اخفف عليه: ما شاء الله عليك .. كل هذا في يوم واحد .. اكيد انك مرتاح انك أديت واجبك نحو ابوك الله يرحمه.
قال: يا إبراهيم .. ما حارتاح إلا لما اشوفه بعيني يدخل الجنة ... والله إني خايف عليه ... وخايف منه.
استغربت .. قلت: خايف عليه وفهمتها .. لكن خايف منه .. ليش! تنهد تنهيدة طويله ثم قال كلام .. عمره ما خطر في بالي أبدا.
يقول: يوم القيامة الواحد في عرض حسنة .. يوم يفر المرء من أخيه وأمه وأبيه .. أخاف يجيبني يوم القيامة قدام رب العالمين ويقول: يا رب ابني هذا أنجبته ... وأنفقت عليه .. وأحسنت تربيته .. كم من ليالي سهرت عليه ... كم مرة حرمت نفسي لأجل أعطيه ... وعلمته القرآن .. وعلمته الصلاة .. وكنت أخذه من يده للمسجد .. وعلمته حق الوالدين ... وأنك أمرت ببرهما .. فلما مت ما برني .. ولا أدى حقي .. ولا دعى لي .. فاقتص لي منه .. وأعطيني من حسناته .. واطرح عليه سيئاتي... ساعتها ... ويش اسوي .. وين اروح ... من مين أفر .. من أبي .. ام من رب العالمين .. أين المفر ...ثم بكى وانتحب وقرأ: ( يقول الإنسان يومئذ أين المفر * كلا لا وزر * إلى ربك يومئذ المستقر)
الأربعاء أبريل 17, 2024 6:19 pm من طرف 
