كــــــلام انســــــــــان متفائل ...

السلام عليكم ورحمة الله وبركاته

عندما كنت قاعد معاه هناك ... اخد شهيق طويل و اتنهد و قالي,,
- الدنيا دي غريبة اوي يا أخي
قلتله أكيد.. عارف,, انا لما الدنيا بتضحكلي , بشك في عنيا, بحس اني محتاج أغير نضارتي..

قالي,,
- هو انت يا أخي ليه لما الدنيا بتتأزم مبتفتكرش الأيام الحلوة؟

قلتله, عشان في الأيام الحلوة بنسي انها إتأزمت قبل كده

قالي ..
- فيلسوف سيادتك؟
قلتله ابدا.. انا مجرد إنسان إتمني يكون في زمان قبل الزمان و مكان غير المكان .. إنسان حب و ماتحبش و لما إتحب ما طالش
- بيقولوا ان الانسان مأخوذه من النسيان!!

قلتله أكيد ,, ما هي الدنيا من الدناءة.. يبقي لازم اللي يعيش فيها يكون بينسي

سألني

- تفتكر ايه الفرق بين الحكيم و الفيلسوف؟
- انا اقولك... الحكيم هو اللي لما يتسأل يرد علي قد السؤال أما الفيلسوف,, من غير مايتسأل بيرد بألف سؤال

سألني ,,

- طب و إيه الفرق بين الصراحة و الوقاحة؟
قلتله ..
- الصريح بيتجنب الوقاحة و قلة الأدب في كلامه أما الوقح فبيتعمد يغلط في كلامه و إن جيت تلومه يقولك الحقيقة مرة, بس الصراحة.. دي إسمها بجاحة
قالي و ليه دايما الحقيقة مرة؟
قلتله عشان السكر بيغلي كل يوم و سكر الحقيقة طولة البال و طولة البال بقت مستحيل في زمانا

قالي,,,

- ايه الفرق بين الصعب و المستحيل؟
قلتله..الصعب لما تكون في مشكلة كبيرة و مش لاقيلها حل و فجأة يظهر الحل قدامك و تعمله, , أما المستحيل انك تبقي عارف الحل من الأول و صعب تنفذه

سألني تقدر تعرف الحب؟

- اه, ا ل ح ب

- و الحزن؟

- برضه ا ل ح ز ن
- ايه هو ده ؟؟ انا بقولك قولي معناهم
- الحب.. انك لما تحس انك في إحتياج لحاجة من إنسان بعينه و مينفعش تاخدها من غيره
- طب و الحزن؟
- ييجي لما متلاقهوش

-انت مجنون
لأ.. أنا أعقل مجنون ممكن تعرفه

- قالي تعرف ايه عن الحب؟
- قلتله الحب احساس و الاحساس ميتوصفش لا بكلام و لا برموز.. مجرد انه بيتحس و بس, بس من غيره ممكن تشعر انك وحيد

- طب تقدر تقولي الفرق بين الوحدة و لما تكون وحيد؟
- قلتله بسيطة.. الوحدة لما بتيجي بتفرض نفسها عليك و علي حياتك
اما لما تكون وحيد , ده انت اللي بتسيب كل اللي معاك و تدق علي باب الوحدة

- قلتله عارف انا ايه أكتر حاجة مش بحبها؟
- سألني إيه؟ قولتله أي سؤال بادئ بأداة الإستفهام " ليه .... " ؟
- سألني ليه؟
- ابتسمت و قولتله عشان ليه دي الكلمة الوحيدة اللي صعب انك تكون صريح مع نفسك قبل اللي قدامك
- سألني الناس كلها بتكدب!!
- قلتله اه عشان نسيوا طعم الصراحة.. و حسوا في كدبهم بالراحة

- سألني ليه دايما مبتسم حتي وانت متضايق؟
- قلتله عشان ضحكتي أسيرة حزني و بسمتي بتحررني من الكآبة

- قالي انت بتخاف من ايه؟
- قلتله من الخوف

- قالي عمرك كدبت قبل كده؟
- قلتله انا إنسان و أكيد كدبت في حياتي كتير قبل كده

- قالي انت مش مستغرب من البني آدمين دول؟
- قلتله قوي.. الواحد من دول يفضل يلف و يسعي يدور علي رزقه لحد مايلاقيه... غبي ميعرفش ان رزقه هو اللي لاقاه

- سألني اتعلمت ايه في حياتك؟
- قلتله ان الدنيا بتاخد أكتر ما بتدي و الانسان فيها مستعد يدي أكتر ما بياخد
- قالي ايه هو ده؟

- قلتله تقدر تسميها عملية نصب او احتيال
بس الخسارة بتكون مش فلوس و بس.. لكن حياتك كلها
- قالي هو انت ليه ما بتحاولش تجمل الحقيقة؟
- قلتله لأنها من غير تجميل ....أجمل

» أنت انســــــــــان رائـــــــــع
» لاتحزن:ودائما كن متفائل