اتعودنا لما بنلعب لازم نكسب !

وان ماكسبناش فده بيخلينا نحاول مرة والتانية والتالتة .. فبفقد متعة اللعب لمجرد اننا عايزين نحقق سكور (رقم) في اللعبة .

ومن ضمن الاوهام اللى اتعلمناها هو ان الحياة عبارة عن لعبة فيديو جيم ، لما بتخسر لازم تعيد من الأول ، علشان تكسب وتحقق سكور .. المشكلة هنا ان في اي لعبة بعد ماتحصل على نشوه الاسكور اللحظية ، بتبص في الساعة وبتكتشف انك بقالك كتير بتلعب لعبة واحدة علشان تحقق رقم ، ملوش اي علاقة بيك او بأي حد غيرك ..

وبعض الناس بتتعامل مع الحياة وكإنها لعبة ، مرحلة ، بيقف فيها في مكان معين وبيقع وبيعيد من الاول علشان يرجع لنفس النقطة فبيقع وبيعيد من الاول وهكذا ، وبينسى ان فيه أهم موجود ، فيه أهم اتخلق علشانه وان الحكمة من الحياة هو انك تعيش فيها اكتر من مرة ، مهما كان الاسكور اللى هتحققه ، حتى لو كان رقم ضعيف ، هيكون كتير جدا بالنسبة لحد قعد طول عمره بيعيد ويزيد في نفس المكان ومستني الحظ يكسبه . والصح هنا انك لما تقع تقوم وتحافظ على حماسك وتجرب لعبة تانية ، ولما تقع تجرب لعبة تالتة ، ولما تقع تجرب الرابعة ، المراحل مبتخلصش ، والحياة مبتقفش ، فلو حياتك وقفت عند مرحلة ما ، متعملش ريستارت ، بدل اللعبة وجرب تستمتع بلعبة تانية ، وكمل على كده .

فيه ناس بيكون معاهم Cheat-Code
وده بيكون عبارة عن كلمة سر بيكتبوها لما بيقعوا فبيعدوا المرحلة من غير مايحتاجوا يعيدوا من الاول ، واتعودوا ان كل مرة يقعوا فيها بيقولوا كلمة السر ، اللى ممكن في الحياة تكون واسطة ، تكون فلوس ، او اي حاجة تانية تخليك مترجعش من الأول .

السخرية هنا انك ممكن تستخدم اكواد كتير اوي فتفقد نشوه اللعبة ، وتخلصها ومتحسش انك كان ليك اي دور فيها .

وفيه ناس بتحب تلعب الحياة سنجل ، لوحدها ، الناس ديه حتى لو لعبتها صح ، وكسبت مرة والتانية والتالتة ، احساس المتعة جواها هيكون لحظي ومش هيستمر علشان محدش بيشاركها فيه .

وفيه ناس بتحب تلعب في فريق ، وده انسب الحلول ، انك تلعب حياتك في وجود ناس تانيين ، بيشيلوا معاك الفشل وبيشاركوك النجاح ، وبتحس ان طاقة النشوة بتنتشر وبتستمر بينكم لأطول فترة ممكنة .

وفي النهاية .. الحياة لعبة ، اسمها لعبة الحياة .. ليها اكتر من مرحلة .. الجميل فيها انك تقدر تنط من مرحلة لتانية للمرحلة العاشرة ، المهم انك لو لاقيت نفسك وقعت ف مرحلة ، تدرك انك تقدر دايما تكمل في اي مرحلة تانية من اختيارك ، وتدرك ان النجاح الحقيقي في الحياة مش انك تحقق سكور .. النجاح في حاجتين .. انك تجرب اكتر عدد من المراحل (مهما كان الاسكور) ، انك تلعبها ف فريق .